Atrás · Actualidade · A guía de ECO · Subscrición · Contacto

O termalismo europeo analiza estratexias para reactivar o turismo de saúde



REDACCIÓN · PUBLICADO O 18 DE MAIO DE 2020 · (0)



Manuel Baltar, presidente da Asociación de Cidades Históricas Termais de Europa, presidiu hoxe por videoconferencia a reunión do comité executivo da entidade para planificar un novo modelo termal que impulse este ámbito de actividade e abra novos mercados termais entre Europa e América.


O termalismo europeo reinvéntase para crecer”. Así definiu hoxe Manuel Baltar, presidente da Asociación de cidades históricas termais de Europa (EHTTA) e da Deputación de Ourense, a situación na que se atopa un dos sectores turísticos con maiores perspectivas de crecemento na 'época poscovid'.

Na reunión por videoconferencia do comité executivo da EHTTA, con representantes dos territorios termais máis importantes de Europa, Baltar dixo que é clave “planificar o novo modelo termal e seguir impulsando este ámbito de actividade, entre outras iniciativas, coa apertura de novos mercados termais entre Europa e América”.

Na reunión analizáronse aspectos económicos e organizativos da entidade, como os orzamentos, o balance de actividades de 2019, e presentouse a directora executiva que a partir do próximo mes de agosto levará a xestión da asociación, Simone Zagrodnik (Alemaña), quen desde 2011 desenvolveu o seu labor na EHTTA como xefa de Marketing representando a entidade en eventos nacionais e internacionais.

Manuel Baltar destacou que na reunión “analizamos os asuntos que atinxen ao termalismo europeo, coa vista posta na asemblea xeral da EHTTA, que será a primeira que se vai a celebrar de forma telemática, con representantes das 51 cidades de 18 nacións europeas”, e explicou que se trataron “proxectos tan importantes como o que suporá para o termalismo europeo dar o salto en 2021 aos Estados Unidos, no encontro que terá lugar en Saratoga Springs, un lugar emblemático no ámbito termal dese país, que posibilitará ampliar mercados cara ao consumidor norteamericano e poñer en marcha un paquete turístico europeo nun ano, 2021, onde Galicia será un referente turístico co Xacobeo”, valora o presidente.

Manuel Baltar está convencido de que neste momento poscovid “temos a oportunidade de reactivar os nosos sectores económicos, e o termal é un deles, ofrecendo natureza, a saúde das augas termais e medio ambiente; en definitiva, o relax e o benestar que todos os turistas en todo o mundo van querer buscar e gozar a partir de agora”, afirma.

Na reunión, na que participou desde Ourense o vicepresidente do comité científico da EHTTA, Mario Crecente, tamén se comentou a proposta de incorporación de novos membros a esta rede termal, a máis importante de Europa, e a planificación do próximo Día Europeo do Patrimonio Termal.



Comentar noticia








Enviar

Comentarios (0)