Pisos máis pequenos e máis baratos
En tres lustros a superficie das vivendas novas en España reducirase nun 10 % e no 30 % dos fogares vivirá só unha persoa. Mentres, segue baixando o seu prezo de xeito discreto pero imparable: en Galicia preto dun -2 % neste terceiro trimestre estival.
Para ter una referencia, a día de hoxe, a media da vivenda en España coas notables diferencias que hai por zonas é de 117 m2, cifra que tenderá á baixa alcanzando os 105 m2 en 2035. Por razóns obvias: familias pequenas, cambios demográficos ligados a hábitos e costumes e menor número de persoas por fogar. Se ollamos aos prezos mercar unha vivenda valería ao redor de 187.000 euros. Hoxe o prezo medio de compra é de 201.240 euros así que a baixada é notable.
Son datos dun recente estudo sectorial realizado pola coñecida web inmobiliaria pisos.com que recollen que no aluguer sucederá algo similar,pasarase da renda media actual de 986 euros mensuais aos 917 que se rexistrarían en 15 anos. Estas previsións teñen en conta o efecto da inflación, a evolución dos salarios e a renda das familias, as políticas de vivenda a nivel nacional e europeo, as tendencias do mercado inmobiliario e os modelos de expansión urbanística e territorial das cidades a longo prazo.
Á espera
Pero agora semella non percibirse demasiado esa tendencia á baixa. Neste verán a vivenda en aluguer dunha superficie media de 110 metros arroxou unha renda media mensual de 988 euros, un descenso trimestral dun escaso 0,20 %. O director de Estudos de pisos. com, Ferrán Font, comenta que as decisións de xestión sanitaria desencadean un escenario “moi particular” e admite que é “moi complicado realizar previsións a varios meses vista”. “A demanda podería incrementarse porque moitos potenciais compradores preferirán esperar” cun interese engadido na periferia das cidades, cun teletraballo xa moi estendido, o que desconxestionaría os distritos máis céntricos.
Se botamos un ollo aos datos máis recentes achegados polo Índice Inmobiliario Fotocasa.es vemos que o prezo da vivenda de segunda man en España baixa, efectivamente, neste terceiro trimestre cunha caída do -1,5 %. Primeira despois de tres anos seguidos con datos positivos, o que vai na liña dos datos previos. A situación concreta en Galicia é similar: a vivenda de segunda man entre xuño e setembro caeu un -1,3 % cun prezo medio de 1.554 euros por metro cadrado, liderado pola provincia de Pontevedra con 1.729 euros, seguido da Coruña con 1.567 euros, Ourense con 1.415 e Lugo con 1.063 euros.
Aí está tamén a taxadora de vivenda Tinsa que di que o prezo da vivenda galega neste terceiro trimestre de 2020 baixou un -1,6 %. Desde 2007 o valor dos pisos na rexión depreciouse un 36,5 % pero o mercado residencial tamén evolucionou en negativo no que levamos de 2020. “Durante os primeiros meses de pandemia vimos como os propietarios das vivendas en venda non estaban a baixar prezos”, explica Anaïs López, directora de Comunicación de Fotocasa.es. Pero en setembro o estrés acumulado nótase e cada fenda de economía e “empézanse a ver caídas máis xeneralizadas e algo máis avultadas”.
O concello co prezo do chan máis caro de Galicia é Nigrán, onde o metro cadrado costa 2.499 euros mentres en Vilalba baixamos ata os 685 euros o metro cadrado. Dous mundos. A cidade de Pontevedra está no segundo posto das capitais de provincia máis caras de Galicia, a bastante distancia da Coruña (2.320 euros/m2) –malia que o prezo na urbe herculina baixou este trimestre un 1,5 %– e por diante de Ourense (1.516) e Lugo (1.307).
O conselleiro delegado de Sociedade de Taxación, Juan Fernández-Aceytuno percibe moderación no ritmo de crecemento dos prezos e sinala que é moi probable que se estea anticipando un cambio de ciclo a curto ou medio prazo. Os prezos de ofertas dos portais están a axustarse porque o “gap” que había entre o prezo de mercado e ao que se ofertaba un piso estaba disparado en cidades como Madrid e Barcelona. Estanse vendo moitas rebaixas pero isto non significa que baixe o prezo de peche, baixa o prezo de oferta. E novos confinamentos non van paralizar as operacións. “Temos unha oportunidade de ouro para dar acceso á vivenda a prezos razoables e non necesariamente dentro das cidades”, engade. Hai un interese crecente por vivendas fóra das zonas urbanas con terraza, mellores vistas e xardíns tras a experiencia dos confinamentos.
A vivenda nova está a aguantar mellor os prezos e a usada ten máis capacidade de negociación, e malia que a rendibilidade bruta media do aluguer quedou no terceiro trimestre no 8 % –por riba do dato rexistrado hai un ano– Fernández-Aceytuno coida que “vai baixar” ao competir cunha menor demanda, porque minguou moitísimo o turismo vacacional e todo tipo de turismo en realidade.
Mudanzas de vida
O mercado residencial de calquera país está ligado á forma de vida da xente, a costumes e hábitos, cambios socioeconómicos e tecnolóxicos, transformación urbanística, transporte e ata aspectos culturais e relixiosos. E a evolución demográfica de España continúa coa tendencia de reducir o número de persoas por fogar, non se teñen fillos, “o que incide na cantidade e nas características das vivendas que formarán o parque residencial no futuro” resume Font.
O Instituto Nacional de Estatística (INE) apontoa, de feito, as cifras de pisos.com no seu último informe sobre Proxección de Fogares, e afirma que para 2035 haberá en España máis de 5,7 millóns de fogares unipersoais, case o 29 % do total, e o número de persoas que vivirán soas pasará do 10,2 % ao 11,8 %.
(Extracto da reportaxe publicada no número 353 – outubro 2020)
Comentarios (0)